ليلى خبزي
مزال الكلام بِيناتْنا طويل
بقدرما طوال فراقنا زمان
أنا يا لالة العيالات
لي عندي معاك شنآن
مقريتي حروف النسا في كتاب المجدوب
ما راعيتي
لآيات الرحمان
حبستيني فظلامك شهور
و كملتي بسنين البهتان
محال تعقلي ؟!!
داز عليها زمان
كيف الضحك …..ملي العقل يكون تايه
ما واعي
عايش النسيان
هو النكران ….
هو النكران يا لالة النسوان
وتعدي فجمايلك بلا حسبان
لو كان….
غير لوكان
حفظتي مقامي كإنسان
وجمعتي شملي لي شتاتو عندك سيان
أنااااا …
ما طمعت فنصاص
ما طلبت قصاص
لكن جرحني اللسان
و لسان على لسان …يختلف الأمران
عتابي و خصامي
و بعادي …..
صغروا ليك لمكان
ضياقت عليك؟!
غتكون ضياقت
أنا المجدوبة بنت المجدوب
أيامي عايشاها بلي عطا الرحمان
وأيامك ؟!
أنا لي كنت حلاها فكل زمان و مكان
ولسانك مايحلالي
ولو تقدمي قربان
ولو تحطي بين يدي
صكوك الغفران